
सुर्खेत। कर्णाली प्रदेशका सामाजिक विकास मन्त्री खड्गबहादुर पोखरेलले प्रदेशमा बाल सुधार गृहको अभाव खड्किएको बताउनुभएको छ । कर्णालीका बालबालिका अहिले पनि बाँके र काठमाडौंका बाल सुधार गृहमा पठाउने गरिएकोमा अब प्रदेशका बालबालिकालाई प्रदेशकै बाल सुधार गृहमा राख्नका लागि सरकारले बाल सुधार गृह सञ्चालन गर्ने उहाँको भनाइ छ ।
मन्त्री पोखरेलले कर्णालीबाट अन्य प्रदेशका बाल सुधार गृहमा रहेका बालबालिकाको तथ्याङ्क सङ्कलन गर्ने, स्थानीय तहमार्फत त्यस्ता बालबालिकाको अभिलेख राख्न लगाउने बताउनुभयो ।
कानुन अनुसार १८ वर्षभन्दा कम उमेरका बालबालिकाले कुनै अपराध गरे कारागार पठाउन नमिल्ने भन्दै मन्त्री पोखरेलले सुधार गृह अपरिहार्य रहेको बताउनुभएको छ । कर्णालीमा बाल सुधार गृह नहुँदा विभिन्न मुद्दामा मुछिएर पक्राउ परी थुनाउ आदेश भएका बालबालिकालाई अन्य प्रदेशमा पठाउने गरिएको उहाँको भनाइ छ । उहाँका अनुसार प्रदेशको दशवटै जिल्लामा एउटा पनि बाल सुधार गृह छैन ।
तीनै तहका सरकारले बाल सुधार गृह स्थापना गरेर सञ्चालन गर्न सक्ने कानुनी व्यवस्था भए पनि कर्णालीमा एउटा पनि बाल सुधार गृह सञ्चालनमा छैन । बालबालिकाका क्षेत्रमा लगानी बढाउनुपर्नेमा उहाँको जोड छ । सरकारले सञ्चालन गर्ने सबै प्ररकारका कार्यक्रममा बालबालिकाको उचित सहभागितामूलक नीति, कार्यक्रम र बजेट हुनुपर्ने भन्दै उहाँले प्रदेश सरकारले बालबालिकाको क्षेत्रमा विशेष योजना बनाएर अघि बढेको जानकारी दिनुभयो ।
शुक्रबार बाल संरक्षण तथा प्रवर्द्धन गर्नका लागि भएका कार्यको समिक्षा तथा आगामी प्राथमिकता सम्बन्धी मन्त्रालयमा भएको समन्वय बैठकमा मन्त्री पोखरेलले यस्तो बताउनुभएको हो ।
स्रोत ः गोरखापत्र