गजल

गजल-१

चुप बस्छु बुझेर जिन्दगानीमा कहिले
उम्रदैनन् सपनाहरु खरानीमा कहिले

सम्झिँदा तिमी मुस्कुराएको पलहरु
आफ्नै आँखा देख्छु पानीमा कहिले

हाँगासँग छुट्टिएर बाँच्दैनन् फुलपनि 
सास रहँदैन त्यो फूलदानीमा कहिले

मायामा रिस तिम्रो देख्न धेरै पाइयो
माया भने देखिएन रिसानीमा कहिले

रातमा सूर्य उदाएका आँखा हुन् मेरा
अटाउँदैनन् तिम्रो कहानीमा कहिले

गजल-२

यो संसारनै खास आफ्नो बसमा छैन
आफैले फेर्ने सास आफ्नो बसमा छैन

रस चुस्न भमरा आँफै आउने थिएन 
फूलकोनै सुबास आफ्नो बसमा छैन

तिमीले दिल तोडेर उपहार दिएपछि
यो मनको उदास आफ्नो बसमा छैन

कर्णाली जस्तै लाग्दैछ यो जीवन पनि
उन्नति र विकास आफ्नो बसमा छैन

दुनियाँ आफ्नो बसमा राख्न खोज्नेकै
मर्दा आफ्नै लास आफ्नो बसमा छैन

-कपिल अगस्त्य