तरापी-सर्मी सडक उद्घाटनपछि सामुहिक फोटो खिच्दै जनप्रतिनिधि तथा कर्मचारी । तस्बिरः तातोपानी गाउँपालिका
जुम्ला । तातोपानी गाउँपालिकाको तरापी देखी सर्मी गाउँ जोड्ने सडक उद्घाटन गरिएको छ । बुधबार तातोपानी गाउँपालिका अध्यक्ष नन्द प्रसाद चौलागाँईद्धारा उक्त सडकको औपचारिक उद्घाटन गरिएको हो ।
तातोपानी गाउँपालिका वडा नं. १ को तरापी पाटनदेखि वडा नं. ७ को सर्मी गाउँ जोड्ने सडक निर्माण सम्पन्नपछि उद्घाटन गरिएको तातोपानी गाउँपालिका अध्यक्ष नन्द प्रसाद चौलागाईले बताए ।
सुशासन सेवा प्रवाह र पूर्वाधार विकासमा विशेष प्रथामिकता दिएर काम गरेको तातोपानीले दुर्गम गाउँवस्तीलाई यातायातको पहुँचमा पुराउन सडक निर्माणलाई जोड दिदैँ आएको छ । सोहीअनुसार तरापी–सर्मी सडकको निर्माण गरी बुधबारबाट संचालनमा ल्याइएको अध्यक्ष चौलागाईको भनाई छ ।
सडक उद्घाटनमा पलिकाका उपाध्यक्ष रेवती रावल,प्रमुख प्रशासकिय अधिकृत तीर्थ बहादुर कठायत,सबै वडाध्यक्ष लगायत स्थानीयको सहभागीमा थिए । तरापी–सर्मी सडक संचालनमा आएसंगै स्थानीयबासी उत्साहित भएका छन् । आफ्नै पालिका आउन छिमेकी पालिका तिला गाउँपालिका पुग्नै पर्ने बाध्यताको अन्त्य भएको ताताेपानी गाउँपालिका वडा नं. ७ का अध्यक्ष तिलक रावतले बताए ।
उनले भने,‘आफ्नै पालिका पुग्न तिला गाउँपालिका जानै पर्ने बाध्यता थियो । वर्षौपछि सडक निर्माण भयो । अब आवतजावतमा सहज हुने छ । भने तरापी क्षेत्र स्याउ मकै,आलु उत्पादन हुने खेतीयोग्य क्षेत्र हो । त्यहाँ उत्पादन हुने वस्तु पनि सहजै रुपमा बजारसम्म ल्याउन सकिने छ ।’
तिला नदी माथि पूल निर्माण पश्चात तरापी देखी सर्मी सम्म निर्वाध रुपमा गाडी संचालन हुने छन् । जुम्लाका सबै गाउँ गाउँमा सडक पुगेपनि खोला र नदी माथि पूल निर्माण नहुँदा यातायात पुग्न सकेको छैन् ।
