जुम्ला । भदौ १० गते रसुवा जिल्लामा आएको भीषण बाढीपहिरोबाट प्रभावित नागरिकको उद्धार तथा राहतका लागि जुम्ला उद्योग वाणिज्य संघले प्रधानमन्त्री दैवी प्रकोप उद्धार कोषमा १ लाख १ हजार रुपैयाँ सहयोग गरेको छ।
रसुवामा आएको बाढीपहिरोले ठूलो जनधनको क्षति पुर्याउनुका साथै विभिन्न स्थानमा सडक, पुल, घर तथा भौतिक संरचनामा क्षति पुगेको छ। विपद्का कारण प्रभावित बनेका नागरिकको उद्धार, राहत तथा पुनःस्थापनामा सहयोग पुगोस् भन्ने उद्देश्यले संघले उक्त रकम प्रधानमन्त्री दैवी प्रकोप उद्धार कोषमा जम्मा गरेको हो।
जुम्ला उद्योग वाणिज्य संघले प्राकृतिक विपद् कुनै एक क्षेत्र वा समुदायको मात्र समस्या नभई सबैको साझा पीडा भएकाले कठिन परिस्थितिमा पीडितको साथमा उभिनुपर्ने जनाएको छ। संघले आफ्नो सामाजिक उत्तरदायित्वअन्तर्गत सक्दो सहयोग गर्दै रसुवा बाढीपहिरो पीडितका लागि १ लाख १ हजार रुपैयाँ उपलब्ध गराएको हो।
संघका पदाधिकारी तथा व्यवसायीहरूले विपद्को समयमा राहत तथा उद्धार कार्यलाई प्रभावकारी बनाउन सरकार, निजी क्षेत्र, सामाजिक संघसंस्था तथा नागरिक समाजबीच सहकार्य आवश्यक रहेको बताएका छन्। प्रधानमन्त्री दैवी प्रकोप उद्धार कोषमा जम्मा गरिएको रकम प्रभावित नागरिकको तत्कालीन राहत, उद्धार तथा आवश्यक व्यवस्थापनमा प्रयोग हुने विश्वास गरिएको छ।
जुम्ला उद्योग वाणिज्य संघले रसुवामा भएको प्राकृतिक विपद्प्रति दुःख व्यक्त गर्दै पीडित परिवारप्रति सहानुभूति तथा ऐक्यबद्धता प्रकट गरेको छ। साथै, विपद्बाट प्रभावित नागरिकको जीवन सामान्य बनाउन र राहत तथा पुनःस्थापनाका लागि आ–आफ्नो क्षेत्रबाट सहयोग गर्न सबैलाई आग्रह गरेको छ।
