जुम्ला ः जुम्लाको हिमा गाउँपालिका पूर्व अध्यक्ष रजबहादुर शाहीको निधन भएको छ । उपचारको क्रममा कोहलपुर मेडिकल कलेजमा शुक्रबार विहान निधन भएको हो ।
हिमा गाउँपालिका – ६ महावैपाथरखोला निवासी शाहीले पहिलो स्थानीय तहको निर्वाचन २०७४ मा गाउँपालिका अध्यक्षमा निर्वाचित भएका थिए । उनले एमालेका भैबहादुर रोकायालाई पराजित गर्दै हिमा गाउँपालिकाको अध्यक्षमा नेकपा माओवादी केन्द्र पार्टीबाट निर्वाचित भएका थिए ।
नेकपा माओवादी केन्द्र पार्टीका केन्द्रीय वैकल्पिक सदस्य लक्ष्मीकन्या बुढाका अनुसार उपचारको क्रममा नेपालगज्जस्थित कोहलपुर अस्पतालमा निधन भएको हो । उनले भने दुई साताअघि पार्टीकै कार्यक्रममा सक्रिय रहेका माओवादी केन्द्रका कर्णाली प्रदेश सदस्य नेता शाही विरामी भएपछि अस्पतालमा भर्ना भएका थिए ।
नेता शाहीको कोहलपुर अस्पतालमा निधन भएपनि जुम्ला ल्याएर दाहस्कार गर्ने तयारी गरिएको नेकपा माओवादी केन्द्र पार्टीले जनाएको छ ।
