जुम्ला । जुम्लामा बहुप्रतीक्षित नेपाली चलचित्र ‘लालीबजार’ को च्यारिटी सो भाद्र ९ गतेदेखि सञ्चालन हुने भएको छ। चलचित्रमार्फत सामाजिक यथार्थ, संघर्ष र मानवीय सम्बन्धलाई प्रस्तुत गरिएको निर्माण पक्षले जनाएको छ।
षट्कोण आर्ट्सको निर्माणमा बनेको ‘लालीबजार’ निर्देशक तथा पटकथाकार यम थापाको कथामा आधारित चलचित्र हो। चलचित्रले विशेषगरी बादी समुदायको पृष्ठभूमिमा आमा र छोरीबीचको भावनात्मक सम्बन्ध, सामाजिक विभेद, संघर्ष र जीवनका विविध पाटोलाई कथाको मुख्य विषय बनाएको छ।
चलचित्रमा चर्चित अभिनेत्री स्वस्तिमा खड्कासहित रवीन्द्रसिंह बानियाँ, समाइरा थापा, अभय बराल, मुकुन्दकुमार श्रेष्ठ, प्रेम पाण्डे, आशा पौडेल र गोविन्द सुनारलगायत कलाकारको अभिनय रहेको छ। स्वस्तिमा खड्काले चलचित्रमा बादी महिला ‘मधुवाला’को भूमिका निर्वाह गरेकी छन्।
‘लालीबजार’लाई मनोरञ्जनका लागि मात्र नभई समाजमा विद्यमान यथार्थ र सीमान्तकृत समुदायका कथा तथा भोगाइलाई दर्शकमाझ पुर्याउने चलचित्रका रूपमा हेरिएको छ। बादी समुदायको सामाजिक, आर्थिक तथा पारिवारिक अवस्थालाई चलचित्रले संवेदनशील रूपमा उठान गरेको निर्माण पक्षको भनाइ छ।
जुम्लामा आयोजना हुन लागेको च्यारिटी सोमा स्थानीय दर्शक तथा चलचित्रप्रेमीलाई सहभागी हुन आग्रह गरिएको छ। च्यारिटी सोमा चलचित्र प्रदर्शनसँगै कलाकार तथा चलचित्रसँग सम्बन्धित व्यक्तिहरूसँग भेटघाट र संवादको अवसरसमेत रहने बताइएको छ।
च्यारिटी सोमा सहभागी भएर चलचित्र हेर्न तथा कार्यक्रमलाई सफल बनाउन सहयोग गर्न कलाकार गोविन्द सुनारले जुम्लावासीलाई आग्रह गरेका छन्। उनले स्थानीय दर्शकको साथ र सहभागिताले चलचित्रको उद्देश्यलाई थप बल पुग्ने विश्वास व्यक्त गरेका छन्।
भाद्र ९ गतेदेखि सुरु हुने च्यारिटी सोमा जुम्लाका चलचित्रप्रेमी, युवा, विद्यार्थी तथा सर्वसाधारणलाई सहभागी हुन आयोजकले आग्रह गरेको छ। सामाजिक विषयवस्तुमा आधारित ‘लालीबजार’ले जुम्लाका दर्शकबाट पनि सकारात्मक प्रतिक्रिया पाउने अपेक्षा गरिएको छ।
