यो दृश्य हो, काठमाडौं, गोङ्गवुस्थित बसपार्कको । यातायात व्यवासायीले बिहीबार साँझ लामो दूरीका बसहरु थन्काएपछि यात्रुहरु अलपत्र देखिन्थे । पश्चिम नेपाल पुग्ने एक यात्रु भन्दै थिए, ‘जनतालाई यसरी दुःख नदेऊ ।’ व्यवसायीहरुले आज गर्ने भनेको सेवा वन्दको धम्कीअघि बसपार्कमा यसरी सवारीहरु थन्काइएको देखियो । उता, यातायात व्यवस्था विभागले सेवा रोके तत्काल रुट परमिट खारेज गर्ने बताएको छ । अत्यावश्यक सेवामा हड्ताल गर्ने सवारीको विवरण संकलन गर्न विभागले टोली परिचालन गर्ने जनाएको छ । फोटोः अशोक दुलालरअन्नपूर्ण
काठमाडौं । नेपाल यातायात व्यवसायी राष्ट्रिय महासंघले सरकारबाट विसं २०७४ चैत १८ मा जारी गरेको यातायात निर्दे्शिका खारेजीको माग गर्दै यातायात सञ्चालनमा रोक लगाएको छ।
महासंघले व्यवसायीसँग छलफल नगरी सरकारले यातायात निर्दे्शिका जारी गरेको भन्दै आज देशभरका यातायात सञ्चालनमा रोक लगाएपछि उपत्यकालगायत देशभरको जनजीवन प्रभावित भएको छ।
महासंघका महासचिव सरोज सिटौलाले व्यवसायीले यातायात राम्रो बनाउनका लागि सरकार, व्यवसायी र उपभोक्ता रहने गरी अधिकार सम्पन्न प्राधिकरणको माग गरिरहेका बेला सरकारले अकस्मात् ढंगले निर्दे्शिका जारी गरेको भन्दै आफूहरुले सवारी संचालन बन्द गर्नुपरेको बताए।
’यातायात क्षेत्रमा देखिएको विकृतिको अन्त्य गर्ने हाम्रो पनि उद्देश्य हो, तर सरकार बिना छलफल चल्न खोजेपछि उक्त कदम चाल्न बाध्य भएका हौँ’, उनले भने। महासचिव सिटौलाले आफ्नो माग सुनुवाइ नभए चरणबद्ध आन्दोलन गर्नेसमेत बताए।
अर्का्तिर, कम्पनीमा आबद्ध यातायात व्यवसायीले भने आफ्नो सेवालाई आज पनि निरन्तरता दिने भएका छन्। बिहीबार कम्पनीमा आबद्ध व्यवसायीको यातायात व्यवस्था विभागमा भएको छलफलपछि सेवा दिन तयार रहेको टुरिष्ट बस एशोसिएशन अफ नेपाल (टिवान) का महासचिव कृष्ण आचार्यले जानकारी दिए। “हामीलाई राज्यले सुरक्षा दिन्छ भने हाम्रो कम्पनीअन्तर्गतका सबै सवारीसाधन सडकमा गुडाउँछौँ,”– उनले भने।
महासंघअन्तर्गत अहिले देशभरका ३०५ समितिमा झण्डै चार लाख सार्वजनिक यातायात सञ्चालनमा छन्। रासस
