अहिले सबै स्थानीय तहका योजना देखि सामाजिक सुरक्षाभत्ताका सबै कामकाज गाउँमै हुन थालेको छ । पहिला दिनौँ पैदल हिँडेर सदरमुकाम आउनु पर्ने बाध्यता टरेपछि संघीयताको महसुश बैंकिङ सेवाले पनि गराएको तातोपानी गाउँपालिका स्थानीय रामकृष्ण न्यौपाने बताए ।
उनले भने, ‘सिंजाबाट सदरमुकाम पुग्न बास बस्नु पथ्र्याे तर, अहिले गाउँमै बैंक आएपछि निकै सहज भएको छ ।’ सचिव सुरबहादुर रावतका अनुसार, लाखौँको रकम झोलामा बोक्नु पर्ने स्थिति स्थानीय तह आएपछि छुटेको छ । ‘ज्यानको जोखिम पनि घट्यो, गाउँमै बैकिङ सेवामा मिल्यो ।’ सबै कुराले सहज भएको उनको भनाई छ ।
कुन स्थानीय तहमा कुन बैंक
सदरमुकाम भन्दा सबै भन्दा टाढा रहेको कनकासुन्दरी गाउँपालिकामा कुमारी बैंकको शाखा संचालनमा रहेको छ । जसले गर्दा पहिलेको योजना देखि आर्थिक कारोबारका लागि बास बस्नु पर्ने स्थिति अहिले टरेको सचिव अम्मरराज गिरीले बताए ।
त्यस्तै सिंजा गाउँपालिकामा नेपाल बंगालादेश बैंक, हिमा गाउँपालिकामा नेपाल ईनभेष्टमेन्ट बैंकका शाखा संचालनमा छन् । तिला गाउँपालिमा नविल बैंक, तातोपानी गाउँपालिकामा जनता बैंक, गोठीचौर गाउँपालिकामा सनराईज बैंक र पातारासी गाउँपालिकामा बैंक अफ काठमाडौँको शाखा संचालन भएको छ ।
पातारासी गाउँपालिकामा भने केही सामाग्रीहरु जोड्न बाँकी रहेकाले सेवा संचालनमा आउन सकेको छैन । नमुना गाउँपालिका बनाउने योजना अनुसार बैंकको स्थापनालाई पहिलो प्रथामिकता दिइएको तिला गाउँपालिका अध्यक्ष रतननाथ योगीले बताए ।
