नेपालमा दुई सय ९१ जनामा कोरोना सक्रमण
बाँकेस्थित क्वारेन्टाइनमा मृत्यु भएका युवामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयका प्रवक्ता डा. विकास देवकोटाले मृतक युवामा कोरोना संक्रमण देखिएको जानकारी दिएका छन् । आइतबार बिहान बाँकेको नरैनापुर क्वारेन्टाइनमा रहेका २५ वर्षीय युवाको मृत्यु भएको थियो ।
देवकोटाका अनुसार गत ३० वैशाखमा भारतबाट आएका ती युवामा शुक्रबार राति ज्वरो र झाडापखालालगायतका समस्या देखिएको थियो । घटनाको विवरण आउन बाँकी रहेको उनले बताए ।
नेपालका कोरोना संक्रमणबाट मृत्यु हुनेको संख्या दुई पुगेको छ । यसअघि नेपालमा कोरोना भाइरस संक्रमणबाट सिन्धुपाल्चोक बाह्रबिसेकी २९ वर्षीया महिलाको मृत्यु भएको थियो । नौ दिनअघि काठमाडौंको त्रिवि शिक्षण अस्पतालमा नर्मल डेलिभरी भएपछि उनी घर गएकी थिइन् । तर, ज्वरो र खोकी लाग्नुका साथै श्वासप्रश्वासमा समस्या आएपछि उनलाई स्थानीय अस्पतालबाट बिहीबार धुलिखेल ल्याइएको थियो ।
धुलिखेल अस्पतालका चिकित्सकहरूले उनलाई अस्पताल ल्याएलगत्तै मृत घोषणा गरेका थिए । कोरोनासँग मिल्दोजुल्दो लक्षण भएकाले उनको स्वाब धुलिखेल अस्पतालमै पिसिआर विधिबाट परीक्षण गरिएको थियो । धुलिखेलमा रिपोर्ट पोजेटिभ आएपछि राष्ट्रिय जनस्वास्थ्य प्रयोगशाला टेकुमा पुनः गरिएको परीक्षणमा पनि उनको रिपोर्ट पोजेटिभ नै आएको थियो ।
धुलिखेल अस्पतालमा मृत्यु भएकी महिलाको कन्ट्याक्ट ट्रेसिङ भइरहेको मन्त्रालयले जनाएको छ । सोहीक्रममा उपत्यकाका विभिन्न स्थानमा चार सयभन्दा बढीको नमुना परीक्षणको तयारी छ । जसमा एक सय ५० जनाको पिसिआर र दुई सय ५० जनाको आरडिटी परीक्षणका लागि नमुना संकलन सुरु भएको उनले जानकारी दिए ।
नेपालमा कोरोना संक्रमितको संख्या भने दुई सय ९१ पुगेको छ । संक्रमित सबैको स्वास्थ्य अवस्था सामान्य रहेको मन्त्रालयले जानकारी दिएको छ । संक्रमितमध्ये ३६ जना निको भएका छन् ।
गत २४ घन्टामा पिसिआर विधिबाट एक हजार चार सय ६९ वटा नमुना परीक्षण भएका छन् । आरडिटी विधिबाट दुई हजार २० वटा गरी जम्मा तीन हजार चार सय ८९ वटा परीक्षण भएका छन् ।
अहिलेसम्म पिसिआर विधिबाट २८ हजार एक सय ६० र आरडिटी विधिबाट ६७ हजार ७६९ वटा परीक्षण भएको प्रवक्ता देवकोटाले बताए ।
प्रवक्ता देवकोटाका अनुसार उपत्यकामा ३५ र बाहिर तीन सय ११ गरी तीन सय ४६ जना आइसोलेसनमा रहेका छन् । अहिले देशभरि १८ हजार तीन सय ५७ जना क्वारेन्टाइनमा रहेका छन् ।
https://www.nayapatrikadaily.com/news-details/43514/2020-05-17
