भेटवार्तामा गठबन्धनमा आफ्नो पार्टीले दावी गर्ने सिट र चुनाव लड्ने नेताहरुका बारेमा कुराकानी भएको बुझिएको छ । साथै वाम एकताका लागि एकता संयोजन समिति बनाउने विषयमा समेत नेताहरुबीच कुराकानी भएको बुझिएको छ ।
माओवादीका वरिष्ठ उपाध्यक्ष नारायणकाजी श्रेष्ठ समेत सहभागी भेटवार्तामा आसन्न निर्वाचनको चुनावी घोषणापत्रका विषयमा समेत सामान्य कुराकानी भएको अध्यक्ष नेपाल निकट एक नेताले जानकारी दिए । गठबन्धनका शीर्ष नेताबीच दिउँसो ३ बजे छलफलका लागि समय निर्धारण भएको अध्यक्ष प्रचण्डको सचिवालयले जनाएको छ ।
निर्वाचनका लागि सिट बाँडफाँट र तालमेलको मोडालिटी तय गर्न सत्ता गठबन्धनले गठन गरेको कार्यदलले भदौ पहिलो साता प्रतिवेदन तयार गरेर शीर्ष नेतालाई बुझाउने भनेपनि सहमति जुट्न नसक्दा सिट बाँडफाँट पेचिलो बन्दै आएको छ ।
स्रोतका अनुसार तोकेको समयमा कार्यदलले प्रतिवेदन तयार पार्न नसकेपछि थप एक साता समय माग्ने तयारी कार्यदलको छ । कार्यदलका संयोजक कांग्रेस नेता कृष्ण सिटौला रहेका छन् ।
