सुर्खेत । नेकपा माओवादी केन्द्रका नेताहरू कर्णाली प्रदेशलाई आफ्नो आधार इलाका भन्दछन् । यद्यपि, निर्वाचनमा माओवादीले आफ्नो आधार इलाकामै पनि अन्य दलसँग तालमेल गर्ने गरेको छ । संघीयतापछि दुई वटा स्थानीय तहका निर्वाचन र एउटा राष्ट्रिय निर्वाचन भइसकेको छ । माओवादीले यी निर्वाचनमा कुनै न कुनै दलसँग तालमेल गरेकै पाइन्छ ।
माओवादीको आधार इलाका मै हरेक निर्वाचनमा सिट गुमाउँदै जाने हो भने कर्णालीका माओवादीको साख गुम्दै जाने खतरा बढ्ने भन्दै बुधबार, बिहीबार र शुक्रबार आयोजित प्रशिक्षण कार्यक्रममा चिन्ता व्यक्त गरिएको थियो । दुई दिन जिल्ला समन्वय समितिको सभा हल र शुक्रबार केन्द्रीय नेताहरूको सहभागितामा सिटी हलमा आयोजित प्रशिक्षण कार्यक्रममा माओवादीको जनमत नेताहरूको गुटबन्दी र स्वार्थका कारण गुम्दै गएकोप्रति आम, कार्यकर्ता र सहभागीहरूले चिन्ता व्यक्त गरे ।
प्रशिक्षण कार्यक्रममा सहभागी प्रदेश सदस्य हुम्लाका गोपाल बुढा जनयुद्धको आधार क्षेत्र कर्णाली भए पनि अहिले जनमत खस्किएको प्रति चिन्ता व्यक्त गर्दछन् । रातोपाटीसँग कुरा गर्दै उनले भने, ‘माओवादीका भुइँ कार्यकर्ताले जुन परिस्थिति भोगिरहेका छन्, त्यो नेताहरूको जीवनशैली र व्यक्तित्वसँग नमिल्ने खालको भयो । त्यो हामीले पनि अनुभूति गरेकै कुरा हो । जसले गर्दा पार्टीप्रति जनताको आशा, अपेक्षाको दुरी बढ्दै गएको देखिन्छ ।’
उनी पार्टी अध्यक्ष पुष्पकमल दाहाल ‘प्रचण्ड’ले बोलेका प्रत्येक कुरा वर्तमान अवस्थासँग मेल खाने बताउँछन् । ‘अध्यक्ष कमरेडले जसरी आक्रामक शैलीमा नेताहरूलाई थर्काउनुभयो, निर्देशन दिनुभयो, त्यो स्वाभाविक पनि हो, अब नेताहरू सच्चिनु नै पर्छ,’ उनले भने, ‘प्रशिक्षणले आगामी निर्वाचनमा अघि बढ्न प्रेरित गरेको छ ।’
पार्टी अध्यक्ष प्रचण्डले कर्णाली माओवादीको आधार क्षेत्र भएको र यही क्षेत्रमा माओवादी कमजोर भएको खण्डमा केन्द्रमा समेत त्यसको धक्का लाग्ने बताएका थिए । प्रचण्डले भनेका थिए, ‘म यहाँ (कर्णाली) मा पनि गुटैगुट देख्छु, त्यो कार्यकर्तामा होइन, नेताहरूमा । कार्यकर्ताहरूलाई नेताहरूको गुटबन्दीलाई तोड्ने गरी अघि बढ्न आग्रह गर्दछु ।’
नेताहरूकै कारण अपेक्षाकृत रूपमा जनमत नपाएको भन्दै प्रचण्डले नेताहरूलाई सचिन्न निर्देशन दिएका थिए । प्रचण्डको भनाइपछि सिटी हलमा व्यापक हो–हल्ला नै मच्चियो । प्रशिक्षण कार्यक्रममा सहभागी एक केन्द्रीय सदस्यले रातोपाटीसँग भने, ‘प्रचण्डज्यूले जे भन्नुभयो, कर्णालीमा ठ्याक्कै त्यही भएको छ । जसले गर्दा नेतामा मात्र नभई कार्यकर्तामा समेत विभाजनको घनचक्कर बढेको छ ।’
ती केन्द्रीय सदस्यले मुख्य गरी कर्णालीमा दुई वटा गुट रहेको बताए । ‘त्यो भनेको शक्ति बस्नेत र जनार्दन शर्मा हो,’ उनले भने, ‘उहाँहरुबीचको गुट–उपगुटको लडाइँले कार्यकर्ता विभाजित भएका छन् ।’
