प्रधानन्यायाधीश चोलेन्द्र शमशेर राणाको राजीनामा माग्दै कानुन व्यवसायीले सर्वोच्च अदालत परिसरमा गरेको आन्दोलनमा झडप भएको छ । कानुन व्यवसायीहरु सर्वोच्च अदालत अगाडिको सडकबाट नारा जुलुसहित अदालत परिसर छिर्ने क्रममा प्रहरीले हस्तक्षेप गर्दा झडप भएको हो ।
त्यसक्रममा केही कानुन व्यवसायी पक्राउ समेत परेका छन् । कानुन व्यवसायीहरुले आज प्रधानन्यायाधीश राणालाई सर्वोच्चमा प्रवेश गर्न नदिने बताएका थिए । प्रहरी र कानुन व्यावसायीबीच धकेलाधेकल र झडपपछि अहिले कानुन व्यवसायीहरु सर्वोच्च अगाडी धर्नामा बसेका छन् ।
नेपाल बारमा भेला भएका कानुन व्यवसायीहरु सर्वोच्चमा धर्नाका लागि पुगेका थिए । सो क्रममा उनीहरुले ‘असक्षम अनैतिक प्रधान्यायाधीश राजीनामा देऊ’ लेखिएको पर्चा छातीमा टाँसेर प्रधानन्यायाधीशविरुद्ध नाराबाजी गरेका थिए ।
न्यायपालिकाको विकृति, विसंगति, भ्रष्टाचारविरुद्ध भन्दै नेपाल बार आन्दोलित बनेको हो । उनीहरुले प्रधानन्यायाधीशले न्यायपालिकाको गरिमा कायम राख्न नसकेको भन्दै राजीनामा नदिएसम्म आन्दोलन जारी रहने बताएका छन् ।
प्रकाशित मिति : २०७८ कार्तिक २६ गते शुक्रवार